चहा की कॉफी....?

चहा की कॉफी?

" चहा की कॉफी ? "असा सर्वसाधारण नेहमी विचारला जाणारा प्रश्न . काहींना चहा प्रिय तर काहींची प्रेयसी कॉफी . चहा हा कधीही व कसाही घेतला जाणारा तर कॉफी म्हणजे खास, ती धुसमुसळपणा , घाई अशा प्रकारात अजिबात घेतली जाणारी नाही . कॉफीसाठी विशेष अशी मैफल बनवावी लागते , तिची खास फर्माईश करावी लागते आणि समोर पाहत आसपासचे वातावरण व  रूप-रंग पाहत कॉफीचा गंध हा श्वासात भिनवला जातो  ; मग अलगद तिला अर्धवट ओठांना लावले जाते नकळत जिभेने त्या ओठांवरच्या अर्धवट कॉफीची चव घेतली जाते आणि मग पसंतीची मोहोर उमटली की मग हळूहळू कॉफीचे घोट घेतले जातात .
चहा मात्र सहज चालता चालता तर कधी वन बाय टू , कटींग अशा तऱ्हेने घेण्याची मजा काही निराळीच किंवा औरच परंतु कॉफीला असले शेअरिंग मात्र कधी मान्य नसते ; तसेच तिला जर वन बाय टू असे जरी विभागले तर मग ती रुसून बसते ,ती लगेच थंड होते  . तिची त्यावेळेची चव म्हणजे कोमट पाण्याच्या दोन घोटांपेक्षा काही वेगळी नसते . असा तर तिचा रुसवा .
चहाला कोणाचीही साथ चालते , परंतु कॉफी मात्र स्पेशल असते आणि कॉफ़ीसाठी असलेली वेळही राखीव आणि निवांत असावी लागते . चहा चवीने गोड तर कॉफी मात्र कडू... थोडीशी रुसलेली अशी असते. 
चहा बरोबर गप्पा रंगतात तर कॉफीच्या वातावरणात मनातले भावना तरंगतात .
चहा सभोवतालचा नीरव शांततेत ही गोंधळ घालणारा , तर कॉफी मात्र त्या सर्व गोंधळातही निवांतपणा साधणारी . चहा एखाद्या मुलासारखा,  आवाज यायचा अवकाश की हा एकदम रेडी तयार असणारा . कॉफीचे मात्र तसे नाही ती मुलीसारखी... नखरे करणारी , तोरा मिरवणारी तयार व्हायला वेळ घेणारी.  ती पहिल्यांदा नटणार , थटनार आणि मगच आपल्याला खूप वेळ वाट पाहायला लावून भेटायला समोर येणार.
चहा नेहमीच आवाक्यात तर कॉफी मात्र विचारांच्या पलीकडे .
चहा नदीसारखा झुळझुळ वाहणारा अगदी नजरेच्या टप्प्यात  ; कॉफी मात्र गूढ अथांग समुद्रासारखी थांगपत्ता लागू देणारी .
गडद चहा मनाला तजेला देणारा तर कडक कॉफी आत्मविश्वास जागवणारी .
चहा संपेपर्यंत  ,कप उलटा करून तर कधी बशीत ओतून पिला जाणारा तर कॉफी उरेपर्यंत तिचा आस्वाद घेतला जाणारा .
चहा म्हणजे गीत तर कॉफी म्हणजे संगीत...
चहा म्हणजे सभा , कॉफी म्हणजे मैफिल .
चहा म्हणजे गडबड घाई आणि कॉफी म्हणजे निवांत क्षण थोडक्यात चहा म्हणजे त्याच्यासारखा अल्लड तर कॉफी म्हणजे तिच्यासारखी गुणी ....
-विक्रम अरने.